HALQIMIZNIÑ HATIRASINDAN SILINMEZ ADIÑ

HALQIMIZNIÑ HATIRASINDAN SILINMEZ ADIÑ

Aprel 26 künü Bağçasaray rayonınıñ Albat (Kuybışevo) köyünde halqımıznıñ istidatlı yazıcısı, cenk iştirakçisi, milliy areketimizniñ yetekçi vekillerinden biri Seitümer Eminge abide qoyuldı.

Seitümer Emin Albat köyünde 1921 senesi dünyağa kele. Cenk yılları Aqyarda, Odessada, Novorossiyskte qanlı uruşlarda iştirak eterek, ağır yaralana. Gospitalde tedaviylengen soñ, Cebbar Akimniñ muarrirligi altında çıqqan "Qızıl Qırım" gazetasında mesül kâtip vazifesinde çalışa. Soñra Qırım dağlarında partizanlıq ete. Amma 1944 senesi Qırımnı azat etmek oğrunda fedakârca küreşken cenkçini bütün hal¬qınen beraber sürgün eteler. Seitümer Emin Özbekistannıñ Bekabad şeerine tüşe. Farhad GES qurucılığında çalışa. 1955-1956 seneleri milliy areketke qoşulıp, Cebbar Akim, Bekir Osman, Mustafa Selim kibi yetekçilernen beraber halqımıznıñ aq-uquqlarını tiklemek, halqnı ana-Vatanğa qaytarmaq içün faal küreşe. Bekabaddan Taşkentke köçken soñ Ğafur Ğulam neşriyatında, "Lenin bayrağı" gazetasında çalışa. Bir çoq bediiy eserler yaza, bir sıra kitapları çıqa. Milliy arekette iştirak etkeni içün işten boşatıla ve Novorossiysk şeerine köçip ketmege mecbur ola. Amma qayda olsa da, icatnı devam ete, onıñ şiirlerinde Vatan ve küreş mevzusı esas yerni tuta. Olsun Novorossiyskte, olsun Moskvada halqımıznıñ ötkergen mitinglerinde ög safta bulunıp, özüniñ ateşin çıqışlarınen er kesni ruhlandıra. Edip Novorossiyskte 2004 senesi vefat etti. Seitümer Eminniñ doğmuş köyünde qoyulğan abideniñ açılış merasiminde "Namus" cemaat teşkilâtınıñ vekili Timur Çelebiyev tebrik sözlerinen çıqışta bulunğan soñ, yazıcınıñ ömür arqadaşı Dilâra hanım ve qızı Bingul abideniñ üstünden beyaz çarşafnı alıp taşlap, tantanalı tedbirni başladılar. Dua oqulğan soñ, "Namus" cemaat teşkilâtınıñ reisi Dilşad İlyasov sözge çıqıp, bu abideni tiklemek ğayesi 2011 senesi – edipniñ 90 yıllığına bağışlanğan tedbirde peyda olğanını bildirdi. – "Namus" teşkilâtı abide tiklemek ğayesine qoltutması içün halqqa matbuat vastasınen muracaat etti.

Muracaatqa seslengen bütün teşkilâtlarğa, iş adamlarına, albatlılarğa, yerli akimiyetke teşekkür bildirem. Alla eyiliklerine qaytarsın, – dedi Dilşad İlyasov. Ondan soñ tedbirde yerli akimiyet vekilleri, milliy areket iştirakçileri, oca ve yazıcılar çıqışta bulunıp, Seitümer Eminniñ yapqan hızmetlerine, yazğan eserlerine yüksek qıymet kesip, milletimiz onıñ kibi ziyalılarını unutmay ve unutmay¬cağını ayttılar. "Selsebil" kemaneciler ansambli, "Ebediyet" ve "Aqbardaq" gençlik ansamblleri merasimni öz çıqışlarınen yaraştırdılar. QMPU qırımtatar ve türk filologiyası fakultetiniñ talebeleri Seitümer Eminniñ şiirlerini oqudılar. Edipniñ ruhu şad olsun.

SEYRAN SULEYMAN